Į pradžią

„ŽEMAIČIŲ ŽEMĖS" ŽURNALAS. 2003 m. Nr. 1

ŽUOLĖNĖ

 

Švėntės ištakas - gėliuo senuovie. Ėlgā bova prijimta lig pat rogpjūtė 15 d. nevalgītė naujuojė derliaus. Sakuoma: je par Žuolėnės i bažnīčė noėisi be kvietku, žuolīnu bukietelė - vel’s ispėrs i oudėga.

Žuolėnės ėšvakaries vėsė seniau liuob gerā nosėpraustė, ėšsėvanuotė pėrtie ėr tēp vėsus pasėbėngosės jevapjūtės nešvaromus nosėplautė. Par žuolėnė i vėina krūva nu sena īprasta rinktėis vėsā gėmėnē, nes je tuo nepadarīsi, metā būs biednė. Dabā gražiausē Žuolėnė īr švėntama bažnīčiuo. Tou dėina i bažnīčė žmuonis nešas švėntintė gieliū, katruos soskintas ėš darželė, bukietieli. Pri tū kvietku gal dar pridietė ėr vaistiniu žuolīnu šakieliu, ivairiū jevū varpu. Pašvėntintus žuolīnus liuob sauguotė, anus kaišiuojė nomūs pu balkēs - žmuonis vierėjė, ka tėi žuolīnā suodība nu vėsuokiu nelaimiu apsauguos. Par žuolėnės pašvėntintus bukietelius onkstiau žmuonis liuob dietė ėr mėrosējem i graba. Seniau i bažnīčė Žuolėniu dėina pašvėntintė žmuonis liuob neštėis ėr naujuojė derliaus rīšulieli, rogepjūtės pabaigtoviu vainėka grūdū saujelė. Ka kėtū metu derlius gerā ožderietom, ka anou aplėnktuom vėsuokės negandas, parsėneštus pašvėntintus grūdus liuob imaišītė i sieklā skėrtus grūdus. Par Žuolėnė seniau žmuonis i bažnīčė liuob neštė švėntintė ėr pėktžuolės ėš tū laukū, kor sunkē liuob būtė anas ėšnaikintė. Pu pašvėntėnėma liuob parneštė anas atgal i lauka ėr tėn pat padėigtė. Seniau žmuonis tėkiejė, ka par Žuolėnė rēk švėntintė ėr daržuovės - paskou anuom gal gīdītė sosėrgusius gīvulius.

Nu sena tou dėina žmuonis liuob diekavuotė ėr aukuotė ož ėšauginta derliu deivē gimdītuojē Ladā. Par Žuolėnė īr lonkuomė gėmėnės, sosiedā ėr draugā, prisėmėnamė mėrė žmuonis.

Žuolėniu dėina paguonis sava apeiguos ėšskėr rodėns Dagas - Sambariu - šventės elemėntus. Par anou onkstiau mūsa pruotievē liuob diekavuotė derliaus deivē gimdītuojē Ladā.