Tautosaka Istorija Kultūra Kalba Lankytinos vietos Vyskupija Literatūra Žemaitijos herbas
Tautosaka Naujienos Redaktoriaus žodis Archyvas Atsiliepimai
RodyklėĮ pradžiąInformacija

DAINININKĖ VAČIKAUSKĀTĖ PAULINA

(žemaitėškā)

Parėngė Mukātė Loreta


 Lankos vingioj karčimeli

 

 

1. Lankos vingioj karčimeli,
Oi oi oi,
Tin gyvena šinkorkeli,
Oi oi oi.

2. Ir atjoja trīns bernele,
Oi oi oi,
Viena tieva laidokele,
Oi oi oi.

3. Vienas prašė arėlkeles,
Oi oi oi,
O antrasis aluteli,
Oi oi oi.

4. O tretysis saldaus vyna,
Oi oi oi,
Tas pragėri sava mīla,
Oi oi oi.

5. Kuris gėri aluteli,
Oi oi oi,
Tas pragėri kepureli,
Oi oi oi.

6. Kuris gėri arielkeli,
Oi oi oi,
Tas pragėri jūdbėreli,
Oi oi oi.

 7. Kurs pragėri sava mīla,
Oi oi oi,
Tas pareji raudodamas,
Oi oi oi.

 8. Kurs pragėri kepureli,
Oi oi oi,
Tas pareji dainiūdamas,
Oi oi oi.

9. Kurs pragėri jūdbėreli,
Oi oi oi,
Tas pareji švilpaudamas,
Oi oi oi.

Aušt aušra veikei

 

 

1.Aušt aušra veikei,
Gied gaidei tankei,
Teka sauleli
Par beržīneli.

 2. Sauli tekieji,
Vandū mirgėji,
Mano brolelis
Žirgi sedėji.

 3. Par kiema ėji –
Visas žibėji,
Vartelius kėli –
Atsižvilgėji.

 4. Oi broli, broli,
Broleli mano,
Ar žadi joti
I svečiū šali?

5. Aš žadu joti
I svečiū šali
Ir žadu vesti
Jauna mergeli.

6. Neveski jaunos,
Neveski senos,
Nevesk, broleli,
Didžei bagotos.

7. Sena neklausīs,
Jauna neslaugīs,
Vo bagotoji
Žodeleis daužīs.

8. Imk, broleli,
Varga mergeli,
Varga mergeli
Darbininkeli.

9. Ji tavi pajaus,
Ji tavi priglaus,
Ir pavargusiam
Kojeles nuaus.

 Platiau aple P. Vačikauskātė ėr anuos dainas:

Važioudamė i Šėlalė, 1959 metās Šėlalės rajuonė vīkosės fuolkluora ekspedicėjės dalīvē D. Palionītė ėr V. Narmonts pakeliou puorā dėinū sostuojė Plunksniū kaimė (dā Šėlutės rajuonė). Fuolkluoristā če nuoriejė ožrašītė liaudės dainū, katras dainiava Vačikauskātė Paulina, meluodėjės. (P. Vačikauskātė bova gėmusi 1895 metās.) Anuos dainū tekstu rinkini (aple 190 dainū tekstu) dā prīš metus bova parėngės ėr Muoksla Akademėjē perdavės Vėlniaus Universiteta stodėnts Vielios Norberts.

P. Vačikauskātė dainū rinkiejēms papasakuojė, ka ėlga laika oždarbiava verpdama arba siūdama pas sosiedus. Tēp ana īprata dainioutė nemažā neliaudėškas kėlmies buitėniu – līrėniu dainū. Tonkē ėr tū dainū meluodėjės neatėtėka teksta turėnė arba anū intuonacėjės bova nelietovėškas. Ekspedicėjės dalīvē stuoruojies atrinktė ėr ožrašītė tik originaliū, tipėšku žemaitėšku dainū meluodėjės. Ėš vėsa anū bova sorinkta 71. Tuos dainas karto so D. Palionītės ėr V. Narmonta ožrašītuoms meluodėjuoms bova itrauktas i rinkėni.

P. Vačikauskātės padainioutu dainū meluodėjės tor daug vertingu žemaitiu daugebalsoma bruožu. Pagal dainū turini matuom, ka pateikiejė daugiausē žėnuojė vestovėniu ėr jaunima dainū. Rinkėnie īr kelės dainas, katruos ožrašītas dvėjēs balsās. Kāp rašė sava ekspedicėjės ataskaituo D. Palionītė ėr V. Narmonts, ontro balso tarpās prituravuojė P. Vačikauskātės martė, pas katrou 1959 metās pateikiejė gīvena.


© Regionų kultūrinių iniciatyvų centras.
Tinklalapis atnaujintas 2014.09.01 .
Pastabas siųskite adresu: zemaiciu@gmail.com

Istorija Kultūra Kalba Lankytinos vietos Vyskupija Literatūra
Tautosaka Naujienos Redaktoriaus žodis Archyvas Atsiliepimai
RodyklėĮ pradžiąInformacija