Į pradžią

"ŽEMAIČIŲ ŽEMĖS" ŽURNALAS. 2002 m. Nr. 3
 
ŠVĖNTAS MĖŠĖS – ŽEMAITIU KALBO 
 
Puocātė Audruonė 
 
Vilniaus Bernardinu bažnīčė, katruo vīka pėrmuosės žemaitėškas Švėntas mėšėsGegužės pabaiguo Akademėnė žemaitiu jaunima korporacėjė „Samogitia“ surėngė žemaitiu studėntu sosėtėkėma so Vėlniou dabar gīvenontēs ėr dėrbontēs proncėškuonās – bruolēs Astėjo, Algio, Ričardo ėr Ramūno. Sosėtėkėmė daugiausē bova šnekieta aple tou, ka laiks būtom i Žemaitėjės bažnīčės sugroužintė žemaitiu kalba. Pasėruoda, ka ėr vėinė, ėr kėtė mėslėj tēp pat: diel kuo žemaitē tor melstėis ne sava kalbo, diel kuo gėismės, kažkumet gėiduotas žemaitėškā, dabar īr meldamas tik lietovėškā?
Vėsė sotarė, ka rēk imtėis konkretė darba. Studėntā pranciškuonams pasiūluojė pėrmėms Lietovuos bažnīčiuos pradietė laikītė mėšės žemaitiu kalbo.
Tuoki pasiūlīma padiejė suformoutė Akademėnė žemaitiu jaunima korporacėjės „Samogitia“ nariū keliū metu draugīstė so Lėnkėjės Pamarė kašubu kultūras žmuonimis ėr kašubu pavīzdīs. Priš keliuolėka metu Lėnkėjės Pamarė kašubā sava kalba jau bova beveik vėsā ožmėršė, bet anū konėgams atejė i galva mintės, ka vėsuom ėšgaliem rēk pradietė tou kalba gaivintė. Tou anėi pėrmiausē pradiejė darītė Kašubėjės bažnīčiuos. Iš pradiū bova pamuokslā kašubu kalbo. Anėi išjodėna žmuonis. Laikou einont tas parauga i muokītuoju kultūrini jodiejėma, pakielė ėr jaunima etnėnė savėmuonė.
Prancėškuonā vienuolē svetiūs pas Akademėnė žemaitiu jaunima korporacėjė „Samogitia“Akademėnė žemaitiu jaunima korporacėjės „Samogitia“ narē laikuos tuos puozicėjės, ka žemaitiu kalbuos nauduojėms Žemaitėjės bažnīčiuos irgi dėdėlē sostėprintom žemaitiu kalbuos statusa Lietovuo.
Pu sosėtėkėma so prancėškuonās vėinė iš studėntu maldas i žemaitiu kalba vertė, kėtė žemaitėšku gėismiū ėiškuojė – karto so vėinuolēs proncėškuonās ėr Bernardinu bažnīčės varguonėninkė bova parėngts nedėdėlis žemaitėšku maldū, skaitėniū ėr gėismiū rinkinielis.
Bėrželė 13 dėina, par Šv. Ontuona, Vėlniaus Bernardinu bažnīčiuo bruolē proncėškuonā Ramūns ėr Algis sosėrinkosėms jaunėisėms žemaitems (daugiausē studėntams) atlaikė mėšės žemaitiu kalbo.
Mėšiuoms vėsė lėka patėnkintė. Sotarta, ka nu šiū metu rodėns bruolē proncėškuonā Vilniou žemaitėškas mėšės laikīs bėnt vėina karta par mienesi.
Vuo kāp bus patiuo Žemaitėjuo, kėik tėn žemaitiu kalba i bažnīčė bus isileidama, tuoleroujema, priklausīs nu tėn gīvenontiū žmuoniū, daugiausē nu konėgū.
 
Būrielis Akademėnė žemaitiu jaunima korporacėjės „Samogitia“ nariū  sava būstinie Vilniou
Maldū, gėismiū ėr skaitėniū rinkinielis, katros bova sodarīts pėrmuosiuoms žemaitėškuoms mėšiuoms. Paruošė Akademėnė žemaitiu jaunima korporacėjė „Samogitia“ ėr bruolē prancėškuonā
 
Maldas
 
Prėsėpažīsto vėsagaliou Dievou,
ėr Tamstuoms, bruolē seseris,
kad dėdelē nosėdiejau
mintimis, žuodēs, darbās ėr apsėleidėmās.
 
Eso kalts, eso kalts, eso dėdelē kalts.
Diel tuo prašau Švėnčiausioujė Mergelė Marijė,
vėsus angelus ėr švėntūsius
ė Tamstas, bruolē seseris,
melstė ož muni Viešpati Dieva.
Tapasėgail mūsa vėsagalis Dievs
ėr, atleidės kaltės,
tanuved mumis i omžėnouji gīvenėma.
* * *
Garbie Tau, Dievė, vėsatas Kūriejau!
Ėš Tava duosnoma torem dounas,
Katrou aukuojem Tamstā.
Tas žemės ėr žmuogaus darba vaisios
Bus mums gīvībės douna.
 
Garbie Tau, Dievė, vėsatas Kūriejau!
Ėš Tava duosnoma torem vīna,
Katrou aukuojem Tamstā.
Tas vīnmedė ėr žmuogaus darba vaisios
Bus mums dvasėnis gierėms.
 
* * *
Švėnts, švėnts, švėnts
Viešpats galībiu Dievs!
Pėlns īr dongos ėr žemė anuo garbies.
Osana aukštībies!
Garbie tam, katros atein Viešpatėis vardo!
Osana aukštībies!
 
* * *
Dieva Avinieli, katros naikini pasaulė nuodiemės,
Pasėgailiek mūsa!
Dieva Avinieli, katros naikini pasaulė nuodiemės,
Soteik mums ramībė.
 
* * *
Tievė mūsa, katros esi dongou,
Tebūn švėnts Tava vards,
Teatein Tava karalīstė,
Tebūn Tava valė
Kap dongou, tēp ė ont žemės.
Kasdėinėnės dounas douk mums šėndėin
Ėr atleisk mums mūsa kaltės
Kap ė mes atleidam sava kaltininkams
Ė neleisk mūsa gundītė,
Bet gelbiek mumis nu pėkta. Amėn.
 
* * *
Pėrmāsis skaitėnīs (1 Kar 18, 41-46)
Elėjos pasakė Ahabou: „Ek i vėršo, pavalgīk ėr atsėgerk; aš, matā, gėrdo, kāp atūž lītos”. Ahabou noejos pavalgītė ėr atsėgertė, Elėjos ikuopė i Karmelė vėršūnė, atsėklaupė ont žemės ėr veido iknioba tarp sava kieliu.
Paskou ons palėipė tarnou:
„Palėpk i vėršo ėr paveiziek i jūra!“ Tas noejė ėr pasižvalgės pranešė: „Nieka nesėmata“. Elėjos pasakė: „Dar karta palėpk i vėršo!“ Tēp kartuojies septīnis kartus. Septintouji karta tarns pranešė: „Ėš jūras kėlst debesielis, žmuogaus plaštakas dėdoma“. Tumet Elėjos isakė: „Ek ėr pasakīk Ahabou: ‘Kinkīkis ėr važiouk žemīn, ka tavės lītos neožkloptom!’“
Ėlgā netrokos dongo apniaukė audruos debesis, pradiejė smarkē lītė. Ahabs ilėpa i vežėma ėr išvažiava i Izraeli. Vuo Viešpatėis ronka vėrš Elėjė atejė, ėr tas susėjousės biega prīšās Ahaba lig tuos vėitas, kor kels šakuojies i Izraeli.
 
* * *
Atlėipamuoji psalmė (Ps 64, 10-13)
P. – Gėismiems Tavėm, Dievė, šluovintė prider švėntuovie.
Lonkā to žemė, driegmė anā doudi, rūpini gausē. Pėlnas ondėns Dieva opės... To augėni žmuogou java. – P.
Anam žemė parėngi tēp: dėrvuos vaga palaistā, solīgėni grumsta, līto padarā anou minkštiesni, palaimėni dīgstonti grūda. – P.
Ėr kor tik tava lonkīta, vėsor gausos derlios,
metėnis tava geradarībiu vainėks. Dīkomuo veš ganīklas, ėr kalvas klest, žalioun. – P.
 
* * *
Puosmielis priš evangelėjė (Jn 13, 34)
P. Aleliuja. – Aš Tamstuoms doudo nauji isakīma, – saka Viešpats, – ka Tamstas vėins kėta mīlietomėt, kap aš Tamstas mīliejau. – P. Aleliuja.
 
* * *
Evangelėjė (Mt 5, 20-26) Meditacėjė ėš „Žuodis tarp mūsa“
Jezos kalbiejė sava muokėnems:
„Jeigo Tamstu teisoms nebus tikriesnis ož Rašta aiškintuoju ėr farizieju teisoma, Tamstas neieisėt i dongaus karalīstė.
Esat gėrdiejė, ka Tamstu pruotievems bova pasakīta: ‘Nežodīk’, vuo kas nožoda, tories atsakītė teismė. Vuo aš Tamstuoms sakau: je kas pīkst ont sava bruolė, tor atsakītė teismė. Kas saka sava bruoliou: ‘Posgalvi!’, tories stuotė priš aukštiausiuojė teisma tarība. Vuo kas saka: ‘Kvailī!’, tas īr smerktėns i pragara ogni. Je neši duovėna pri altuoriaus ėr tėn atsėmėni, ka tava bruolis tor šiou tou priš tavėm, palėk sava atnaša tėn, pri altuoriaus, e ek pėrmiau sosėtaikintė so bruolio, ėr tik toukart, sogrīžės, aukuok sava duovėna.
Geriau nosėleisk sava ėiškuovou dar kelie i teisma, ka ėiškuovs neidoutom tavės teisiejou, vuo teisies – teisma vīkdītuojou, ėr ka to nepakliūtomi i kaliejėma. Ėš tėkrūju sakau tau: neišeisi ėš tėn kol neatsėteisi lig paskotėnė skatėka.
 
Gėismės
 
Linksmībė dongou, džiaugsmos sielā mona,
Ka tarp švėntūju garbėnam Ontuona.
 
Šluovėn krėkščiuonis anou šėndėina,
Maluonė Dieva patīrė ne vėina.
 
Aklė ėr raišė, kortė ėr raupsoutė.
Malda Ontuona īr ėšvadouta.
 
Pakliovė žmuonis i kaltībiu tvana,
Pagalba rond pas švėnta Ontuona.
 
Sieluo maluonė ėš naujė atgīn,
Pri Dieva gera ana šaukt(ė) nebėjė...
 
Pamata porva, katram(ė) ana braida,
Savėm pamatios, savės pasėbaida.
 
Jau truokšt gruoži pėrmīkšti groužintė,
Tujau eit kaltiū Dievou ėšpažintė.
 
Tumet ana gaun tvėrtībės šėrdie,
Naujū pajunt ėšgaliu savie.
 
Nuors ėr pagundas pėktiausės užpol,
Anuos atsėdauž kap i kėita uola.
 
Kas tik Ontuona švėntouji maldaun,
Narsē vėsumet so priešās kariaun.
 
Skėrk, jaunimė, anam sava skaistībė,
Brongiausė sava sielas nuosavībė...
 
Žibies tas torts priveizont Ontuonou,
Nes anou geriausė sarga akės gana.
 
Nelaimē žmuogo vargša ėštėkos,
Be nuosavībės kuokiuos pasėlėkos.
 
Ontuona švėnta šaukas krėkščiuonis,
Atradė džiaugas ėš tuos anuo maluonės...
 
Kap padavėms aple anou saka,
Anam kūdikieli Jėzo nešiuot(ė) teka,
 
Nes ons be gala Viešpati mīliejė:
Anou vėsor matės, aple Anou kalbiejė.
 
Nešk mūsa sieluoms Jezo kūdikieli,
Malduoms gelbiek žmuogo nabagieli...
 
Ka tuos nelaimės mūsa neožkliūtom,
Padietom rastė, jego kas pražūtom.
 
Mes truokštam meilės Dieva pamīlietė.
Atgailuos dvasės kaltiems apgailietė.
 
Vuo, Jēzau gers, gelbiek siela mona
Par ožtarėma švėntuojė Ontuona. Amėn.
 
 
* * *
 
Sveika, žvaigždie onkstīvuoji,
Sveika, Pana švėntiausiuoji,
Esi Suost(o)s Saliamuona,
Žėnklinta rīkštė Aaruona.
 
Esi ož saulė gražesnė
Ėr ož mienesi švėisesnė,
Rūbā Tava ėšriedītė,
Auksa perlās ėšdabintė.
 
Dongaus Suostė pasvadinta,
Nu Sūnaus karūnavuota,
Aniuolū polkā tarnaun,
Anā tarnautė napaliaun.
 
Ėr mes Tavėm garbėnam,
Varda Panuos šluovėnam,
Ont keliu sava poldamė,
Ramībės prašuom verkdamė.
 
Jezos Kristos – Sūnos Tava,
Kors žmuonės atpėrka sava,
Ont mūsa dėdėlē rūstings,
Vuo, ka ons būtom meilings.
 
Je, Pana, To negelbiesi
Ėr sava Sūnaus neprašīsi,
Kor biednė mes pasėdiesem?
Anuo maluonės netoriesem.
 
Je, Pana, To pagelbiesi
Ėr sava sūno parprašīsi,
Tumet ramībie pasėlėksem,
Tavėi daugiau nebnosėdiesem.
 
Ketėnam(ė) pasėtaisītė,
Tavėi daugiau nebnosėdietė.
Pasėgailiek mūsa, Puonė,
Paruodīk sava maluonė.
 
 
* * *
 
Žėnuom Šėrdi tuokė, Šėrdi maluoninga,
Ana vėsėms atleid, nes īr gailestinga.
Ta īr šėrdės Atpėrkiejė
Ėr tėkruojė mūs gluobiejė
Jēzaus Viešpatėis.
 
Ta Šėrdės brongesnė ož vėsuoki gieri,
Tuoboliausė meilė ėr gierībiems žėb.
Kas pasaulis, anuo toštībės?
Sielas ras tėkra ramībė
Jēzaus Šėrdie.
 
Jēzau mona brongos, Tavėi aš aukuojo,
Maldas savuosės
Tavėi dedo puo kuojuoms.
Tava Šėrdie ėr vielek
Ras pagouda vargšė siela
Ėr atgims naujē.
 
 
* * *
 
Linksmībė mona, Jēzau, to esi,
Švėisībė tėkra, Jēzau, mon teiki,
Tegol aš vėskuo nostuoso,
Bet Tavėm, Jēzau, sekiuoso.
 
Gierībė brongi, žėidė mon(a) kvapnos,
Tavėm aš mīlo, nes esi brongos.
Tegol aš vėskuo nostuoso,
Bet Tavėm, Jēzau, sekiuoso.
 
To mona Dėivalis, laimė omžėna,
Lai pėlduos vėsor tik Tava valė.
Tegol aš vėskuo nostuoso,
Bet Tavėm, Jēzau, sekiuoso.
 
Tavėm aš mīlo sava džiaugsmūs(ė),
Daugiau ož vėskou sava vargūs(ė).
Tegol aš vėskuo nostuoso,
Bet Tavėm, Jēzau, sekiuoso.
 
Truokšto, ka žmuonės
Tavėm pažintom,
Nerūstindamė darbās garbintom.
Tegol aš vėskuo nostuoso,
Bet Tavėm, Jēzau, sekiuoso.
 
Tavėm, mon Jezau, douk
pažint(ė) daugiau,
Paskou mīlietė vės karštiau karštiau.
Tegol aš vėskuo nostuoso,
Bet Tavėm, Jezau, sekiuoso.

Mukienės Danutės portėgrapėjės

Tinklalapis atnaujintas 2014.09.01 .
Pastabas siųskite adresu: zemaiciu@gmail.com

Istorija Kultūra Kalba Lankytinos vietos Vyskupija Literatūra
Tautosaka Naujienos Redaktoriaus žodis Archyvas Atsiliepimai
RodyklėĮ pradžiąInformacija