Į pradžią

"ŽEMAIČIŲ ŽEMĖ", 2002 m. Nr. 1

Gruožėnė literatūra – sava muotinu kalbo

Skouda rajuona kultūras žmuonis īr ikūrė Žemaitiu kultūras draugėjės skīrio. Paskotėnēs metās anėi tėn daugiausē diemesė skėr senuosės šiuo Žemaitėjės regėjuona kalbuos puoseliejėmou ė prestiža kielėmou. Žemaitėškā parašītė straipsnē, gruožėnės literatūras kūrėnē spausdėnamė rajuona laikraštie „Mūsa žuodis“, skaituomė kultūras vakarūs, konkursūs. Skoudiškis režisierios Untulis Edmunds pats raša žemaitėškas pjesės ėr žemaitėškus spektaklius stata. 2001 metās Skouda savėvaldībės viešuoji bėbliuoteka paskelbė respublėikini žemaitėškas pruozas ė puoezėjės konkursa. Anam sava kūrėnius atsiuntė daugiau nego 40 žemaitėškā rašontiū žmuoniū, tarp katrū īr ėr kelė Lietovuo pripažintė rašītuojē. Vertėnėma komisėjē šiou karta teka trėguba užduotės: ivertintė konkursou kūrėnius pateikusiu literatu meistrėškoma, žemaitėška raštingoma ėr pasakītė, kas ėš tū rašontiū žmuoniū īr geriausē ėšlaikės žemaitėška pasauliejauta ėr subtiliausē anou perteik sava kūrėniūs.
Konkursos bova švėntė ne tik tėms, kas anamė dalīvava, bet ėr vertėnėma komisėjės narems. Pėrmiausē dieltuo, ka bova sodarīta pruoga pamatītė, kāp tas žemaitėšks žuodis šėndėin laikuos, kāp esam ivaldė rašītėnė žemaitiu kalba ėr kam ta kalba tarnaun.
Pėrmāsis pastebiejėms būtom tuoks, ka dar daug kas ėš rašontiū žmuoniū (daugiausē vīresnė omžiaus literatā) žemaitiu kalba renkas rašīdamė jumuoristėnius kūrėnius. Tas nier prastā, bet žemaitiu kalba ne tik tam gal tarnautė…
Ontra dalės konkursou sava kūrėnius pateikusiu autuoriu atsiuntė darbelius anus ėš bėndrėnės lietoviu kalbuos ėšvertė i žemaitiu. Nier tas tēp pat dėdėlē prastā, bet vertėms lėikt vertėmo. Skaitā ėr jauti, ka žemaitėškas dvasės, ožgrēbėma tuokemė kūrėnelie nedaug. Ėr žemaitėškas sakėnė konstrukcėjės nier.
Vėsā kas kėta skaitont tėkrū žemaitiu žemaitėškā parašītus kūrėnelius. Sakėnē trumpė, mintės gili. Atruoda, ka siedi pas mumunelė ont priklietė ėr klausās, kāp ana pasakuo sava gīvenėma istuorėjė, kāp ved ruoda aple paprastus dalīkus, ėš katrū sosėded vėsos sodietings mūsa pasaulis.
Vėina ėš tuokū autuoriu – skoudėškė medikė Jurgilevīčienė Stasė. Neimontros tas anuos kūrėnielis, bet ėš dūšės ėr žemaitėškā parašīts.
„Žemaitiu žemės“ redakcėjės žmuonis parveiziejė vėsus konkursou atsiūstus kūrėnelius. Autuorems sotėkos, geriausius ėš anū spausdinsem žornalė. Skaitītuojē jau šemė numerie tor galėmībė sosėpažintė so pluoštelio Jurgilevīčienės Stasės (Skouds), Lėngvėnienės Bėrotas (Plungė), Markavīčienės Dalės (Skouds) ėr Rudelė Vaida (Plungė) kūrėniū.


© Žemaičių kultūros draugijos redakcija, 2002
Tinklalapis atnaujintas 2014.09.01 .
Pastabas siųskite adresu: zemaiciu@gmail.com

Istorija Kultūra Kalba Lankytinos vietos Vyskupija Literatūra
Tautosaka Naujienos Redaktoriaus žodis Archyvas Atsiliepimai
RodyklėĮ pradžiąInformacija