Į pradžią

ŽEMAITIU ŽEMĖ. 2001 m. Nr. 4

ŽEMAITIU KALBO

Markavīčienė Dalė

2001 m. lapkrėtė 9 dėina Skouda rajuonė pėrma karta vīka žemaitėšku skaitīmu konkursos. Ons bova skėrts Muotiejaus Valončiaus 200-uosiuoms gėmėma metėniems ėr Kalbū metams. Konkursa somėslėjė Skouda viešuoji bėbliuoteka. Organizava anou karto so Savėvaldībės administracėjės Švėitėma skīrio, vīr. specialistė kultūrā Laureckienė Jedvīgo, Žemaitiu kultūras draugėjės Skouda skīrio. Konkursė dalīvava mažne trīs dešimtis skaituovu. Gruožėnės literatūras kūrėnius skaitė ėr žemaitėškā rašou Skouda rajuona literatā: Jankauskis Juozos ėr Rėmeikis Levuons. Dėdėlė diemesė solaukė Skouda katalėkėškuosės pagrindėnės muokīklas pedaguogės Vaserītės Vilėjės ėr Puoškienės Virginėjės pasėruodīmā.
Pradėnoku būrie geriausēs pripažintė: ontruoks Uščins Artūrs, Skouda pradėnės muokīklas trečiuokā Mamuonuovs Tuoms ėr Navardauskātė Augostina. 5-8 klasiu muokėniū būrie nogaliejė Skouda P. Žadeikė gimnazėjės pėnktuoks Daukonts Vītauts, Daukšiū pagrindėnės muokīklas šeštuokė Želvītė Lina, P. Žadeikė gimnazėjės septintuokė Tammi Juolanta. 9-12 klasiu gropie – Barstītiu vėdorėnės muokīklas dešimtuokė Prialgauskātė Uodeta, Īlakiū vėdorėnės muokīklas vėinioulėktuoks Piekis Darios, P. Žadeikė gimnazėjės muoksleivė Šimkevičiūtė Eglė. Soaugosiūju gropie bova apduovėnuotė vėsė ketorė konkursa dalīvē.
Švėitėma skīriaus paskatėnamāsēs prizās apduovėnuotė: Skouda katalėkėškuosės pagrindėnės muokīklas trečiuokė Stankūnātė Veruonika, Barstītiu vėdorėnės muokīklas septintuokė Kaunātė Aušra, Muosiedė vėdorėnės muokīklas vėinioulėktuokė Ramuonātė Muonika. Soaugosiūju gropie Švėitėma skīriaus ėr Savėvaldībės administracėjės vīr. specialistės kultūrā prizā atėteka muokituojē Vaserītē Vilėjē. Atmėnėma duovėneliems pagerbtė vėsė pedaguogā, katrėi konkursou ruošė jaunūsius skaituovus.


© Žemaičių kultūros draugijos redakcija, 2001
Tinklalapis atnaujintas 2014.09.01 .
Pastabas siųskite adresu: zemaiciu@gmail.com

Istorija Kultūra Kalba Lankytinos vietos Vyskupija Literatūra
Tautosaka Naujienos Redaktoriaus žodis Archyvas Atsiliepimai
RodyklėĮ pradžiąInformacija