Į pradžią

"ŽEMAIČIŲ ŽEMĖ", 2002 m. Nr. 2

Nu sena pasaulis žėnuojė, ka
 
Ožrašė Daukšienė Vanda ėš Skouda rajuona. 2001 m.

 

LAUK LAIMĖS...
Jeigo gondros praded taisītė lėzda unt truobuos stuogo a kamėno.
Jeigo blezdinga taisa lėzda pastuogie.
Jeigo potra, nokelta nu ognėis, vės verd.
Jeigo kuoks miedis nelaiko pražīda.
Jeigo cīp ausis arba kas nuors kou nuors unštink, gausi duovėnū.
 
GAL ATSĖTĖKTĖ NALAIMĖ...
Jeigo netīčiuoms somušē zelkuorio.
Jeigo gondros nelaiko palėka lėzda ėr nabsogrīža.
Jeigo ėš pečiaus mūra ėškrėta plīta.
Jeigo nakti lek nu laktā žemīn vėštas.
Jeigo duris, katruos onkstiau negirgždiejė, praded girgždietė.
 
BUS DŽIAUGSMA A AŠARU
Jeigo nėižt kairi akės, jouksīs, jeigo dešinie, kriuoksi.
Jeigo nėižt lūpas, gausi bučioutėis.
Jeigo nėižt kairi delna, piningū gausi, jeigo dešini, toriesi dėdėliū išlaidu.
 
LAUK KUOKIŪ NUORS NAGEROMU
Jeigo einont kuojė už slėnkstė ožkliūn.
Jeigo einont korpiu ožrīšē atsirėš.
Jeigo kėtam duovėnuosi a pats gausi tuokiū duovėnū: adėta, spėlga, žėrklės, pėili.
Jeigo katėns naramos, biegėnie ėš vėinuos kerties i kėta.
Jeigo keporė a raktus padiesi ont stala.
Jeigo par slėnksti pasėsvėikinsi.
Jeigo rītmetie, kelontėis ėš luovas, ėšlipsi kairė kuojė.
 
SOLAUKSI SVETIŪ...
Jeigo šloujint truoba šlamas lek atgal.
Jeigo verpot a vėjont notrūkst siūls.
Jeigo katėns prausas, veiziek, katruo posie oudėga – ėš tuos posės lauk svetiū.
Jeigo valgont ėš bornuos ėškrimt kousnis arba šaukšts.
Jeigo pagalīs ėškrent ėš ognevėitės.
Jeigo vėštas kaimė mošas.
 
GALI TIKIETĖIS GAISRA A KĖTŪ NALAIMIU, KATRAS ATNEŠ OGNĖS
Jeigo vuoverie ibiega i kėima arba untšuoka unt stuoga.
Jeigo zuikis ibieg I kėima dėina.
Jeigo šou kauk nuosi aukštīn pakielės.
Jeigo gegužie atlek pri nomū.
 
BUS ŠEIMUO A GĖMĖNIE LAIDUOTOVĖS
Jeigo kiaulė knės pri slėnkstė.
Jeigo vėšta staigē praded gėiduotė.
Jeigo šou kauk kėimė galva nodūrės.
Jeigo gegužie kukou medie, pri pat nomū.
Jeigo blezdinga ipol i truoba arba longa.
Jeigo dounas rėikie par vėduri parplīšusi, mėrs kepiejė.
Jeigo snėigs užkrimt i žalius medius, mėrs jaunė.
Jeigo beržos praded geltuonoutė nu galūnės, mėrs jaunė, jeigo pašakės – senē.
 
DAR ŠĖS TAS...
Jeigo draskā blezdingu lėzdus, metas strazdanas.
Jeigo pėrmuoms blezdinguoms atliekos nosėprausi so pėino, būsi vėn balts.
Jeigo pakaušis nėižt, kas nuors keik, vo je žekčiuoji, kas nuors atmėn.
Jeigo skaitē kninga a muokēs ė palėkā kninga, dings atmintės.
Jeigo kvartūgs (prijoustė) atsėrėš ėr nukrimt, pames sožadietėnis (vaikis).
Jeigo isėdauši alkūnė, pames mīlėmāsis.
Jeigo nėižt alkūnė, prisieis pargolietė svetėmuo vėituo.
Jeigo rūkont metas apalė rinkē, bus išgierėms.
Jeigo marškėnius velkontėis apsėvilksi ontrēp, pėrštu galā šerpetuos.
Jeigo muotrėška parlėpa par ėina, bus arkliou sunkē trauktė.
Je lašėnē rasuo, lauk lītaus.
Je paukštē pažemė lakiuo, tēp pat lauk lītaus.
Suodībuo, kor gondra šeimīna gīven, gaspaduorē – duorė žmuonis.
Iššokavusi plaukus, anū i vieji naėšmesk, galva ba parstuojė skaudies.
Vāka ožsėmerkusi nasoupouk, laumės pri anuo pristuos.
Je nakti kelie sotėkā nekrėkšta dūšelė, naėšsėgouk. Paržėgnuok anou ėr ek tuoliau naatsėsokės. Nieka nadarīs.

© Žemaičių kultūros draugijos redakcija
Tinklalapis atnaujintas 2014.09.01 .
Pastabas siųskite adresu: zemaiciu@gmail.com

Istorija Kultūra Kalba Lankytinos vietos Vyskupija Literatūra
Tautosaka Naujienos Redaktoriaus žodis Archyvas Atsiliepimai
RodyklėĮ pradžiąInformacija