Į pradžią

ŽEMAITIU ŽEMĖ. 2001 m. Nr. 4

PRUOFESUORIOU ŽILIENOU ALFONSOU – 80
 
(Straipsnis parėngts 2001 m. Pruofesuorios mėrė 2005 m.)
 
Žemaitiu muokslėninku būrie Lietovuos Muokslu akademėjės narīs korespondėnts, pruofesuorios Žiliens Alfonsos – išskėrtėnė asmenībė. Pėrmiausē – sava santūromo, užsispīrėmo, nuoseklomo. Vilniou ons jau gīven daugībė metu, vuo žemaitėškas šnekuos naožmėrša. Džiaugas kuožno sosėtėkėmo so sava tieviškienās.
Žiliens Alfonsos kėlėma ėš Kivīliu (Akmenės rajuons). Šiū metu spalė 27 d. kolegas, gėmėnis ėr draugā pruofesuoriu sveikėna so garbinga sokaktim – pažīmiejuom muokslėninka 80-meti. Ėškėlmės vīka ėr Lietovuos Muokslu akademėjuo.
Tuokė dėina prisimintė tėkrā ka bova kou. A. Žiliena nuopelnā mūsa valstībės muokslou – dėdliausė. Ons laikuoms XX omžiaus ontruos posės Lietovuos finansistu tievo.
A. Žiliens muokslus Vėlniaus universitetė bėngė 1945 m. Jau kėtās metās bova priims diestītuojautė i tou pati Universiteta. 1960-1964 metās vaduovava Statistikas, buhalterėnės apskaituos, finansu ėr kredita, vuo nu 1964 m. – Finansu ėr kredita katedrā. Dar 1965 m. anam soteikts ekanuomikas muokslu daktara vards. Nu 1976 m. A. Žiliens – Lietovuos Muokslu akademėjės narīs korespondėnts. 1981 m. pruofesuoriou soteikts Lietovuos nosėpelniosė muoksla veikiejė vards. 1982-1987 m. vaduovava Lietovuos muokslėnē ekonuomistu draugėjē. Paskotėnēs metēs pruofesuorios daugiausē tīrėniejė Lietovuos Dėdliuosės Konėgaikštīstės finansus. Tou temo īr ėr kelės kningas parašės. Vuo pėrmūsiūs anuo leidėniūs daugiausē bova analizoujema XX omžiaus ontruosės posės finansu sistema Lietovuo, valstietėjės apmuokestėnėma teuorėjė ėr praktika kapitalizma sālīguom, sovietėniu finansu raiduos bruožā XX omžiaus ontruo posie ėr šiuolaikėnės anū pruoblemas (1971 m.).
80 metu sokaktėis dėinuoms kap ėr vėsomet žvalos ėr energings pruofesuorios Lietovuos Muokslu akademėjuo parskaitė pranešėma „Karības finansavėms Lietovuos Dėdliuojie Konėgaikštīstie”. Jubiliejaus pruogo Muoksla akademėjės bėbliuotekuo (Žīgimantū g. 1/18, Vilnios) 2001 m. spalė 29-lapkrėtė 8 dėinuoms veikė pruofesuoriaus Žiliena Alfonsa muoksla darbū paruoda.
„Žemaitiu žemės” redakcėjė nu pat žornala leidības pradiuos jaut nuolatėni pruofesuoriaus diemesi ėr palaikīma. Džiaugamies tou.
Redakcėjės kolektīva, vėsū Žemaitiu kultūras draugėjės nariū vardo sveikėnam pruofesuorio so gražio jubiliejo!

© Regionų kultūrinių iniciatyvų centras
Tinklalapis atnaujintas 2014.09.01 .
Pastabas siųskite adresu: zemaiciu@gmail.com

Istorija Kultūra Kalba Lankytinos vietos Vyskupija Literatūra
Tautosaka Naujienos Redaktoriaus žodis Archyvas Atsiliepimai
RodyklėĮ pradžiąInformacija